FEATURE

網民不時會出Post討論「覺唔覺某某比人Underrate/低估得好緊要?」某某自己填,筆者覺得「鄧梓峰」絕對擔當得起。巴斯光年、輕輕鬆鬆、十郎、鄧Sir等一連串的銜頭,他都欣然接受,仲覺得幾好玩。眼前這位金牌司儀,據悉不但身家豐厚,個人Portfolio亦厚得交關,成為義勇軍一份子、擁有小型飛機師牌、更有三個潛水牌,既可上天,亦能下海;還有流利德文、法文、字跡分析、詠春、高爾夫球等,每項技能都很中產,連投資也別具品味,十多年來鍾情古董皮褸和Bass結他,他笑言「最開心係可以著上身,又可以玩,好過玩股票,隨時變牆紙、變廁紙!」

與其坐等工作機會 不如多學一技旁身

鄧梓峰說之所以涉獵那麼多範疇,全因生性好奇,自細已經在玩命:「諗返真係唔死得算好彩,細個好貪玩,拮穿人地條車軚、石仔擲汽車、專登等車行到埋身先衝出馬路,因為想睇下自己走唔走得切!四圍爬,成層樓高咁撻落地,成日諗點樣先可以令火車意外出軌,總之讀書唔專注,好奇乜都想試!」他相信人生是「整定」的,「因為自小不努力讀書,所以人愈大就愈要讀返夠本。」自言興趣雖然豐富,但其實未算好精,「我覺得彈Bass、駕駛小型飛機、花式飛行、潛水、打高爾夫球係比較好。」不少人盛讚他富有生活品味,多才多藝,他卻謙稱:「其實品味人人都有,只是有沒有機會實踐。大家目標不同,有人以工作為樂,好多有錢佬好鍾意返工,但對我來說就忽略了生活的享受,或者同我行業有關吧,工作表現好都未必有機會,其他同事會鑽牛角尖,會唔開心,我就無乜所謂,順其自然啦,得閒咪走去學新嘢。」最幸福的事,莫過於他把司儀工作當成興趣,心態不同,活得更輕鬆自在。問他是否覺得自己的興趣都很中產呢?據知他那流利的德文和法文全靠自學,彈Bass也沒有正式拜師學藝,「買書自學吧,土法鍊鋼一樣得!」對鄧梓峰來說,無師自通,過程「其實唔難」,而且花費無幾。「我有朋友好叻踩單車、行山,玩得好專業,花的都是有限錢,最緊要因應自己能力去追求平衡的生活就最好。」

過百件古董馬皮皮褸 打風落雨都照著

鄧梓峰對於投資之道,別有一番心得:「我鍾意投資實物,例如古董皮褸和Bass,我寧願用一筆錢去買最好的一支Bass,最有價值的馬皮皮褸,又有得玩,又可以著上身,唔係仲實際咩?」他說以前買基金,一個金融海嘯可以乜都無晒,「股票變牆紙、變廁紙!所以我享受古董收藏,一定唔會蝕,仲可以流傳幾代,不過就比較嘥位。」他最自豪的收藏品之一是過百件的古董馬皮皮褸,每件都大有來頭,多為40、50年代出品,平均約2至3萬一件,情迷皮褸皆因貪其有性格:「馬皮會隨著人的肢體動作形式獨有的皮痕及紋理,營造出個人專屬的感覺。最重要係全部人手一件件造,不會流於工式化,落針線口唔齊,充滿人性化味道。」跟不少玩皮褸的同好者一樣,因為馬龍﹒白蘭度主演的《The Wild One》中穿上有型有款的Classic Biker Jacket,令他一見愛上。「古董馬皮皮褸價錢只升不跌,上網睇下你就知愈來愈貴,新款只賣羊皮,太薄身,著出來無Shape,亦正正係馬皮珍貴之處。」他說不時也會透過網上從紐約訂造復刻皮褸,並選用較特別的顏色,如軍綠色和深藍色,從而突出個人風格。他更提醒各位古董皮褸玩家,千祈不要鍚住件褸:「要Break in一件馬皮皮褸係要經常著,返工出街要著,唔好怕落雨淋濕唔捨得著,即使行雷閃電都要著,馬皮其實粗到不得了!」問他會否玩埋電單車?他再三強調:「著Biker Jacket踩單車有型啲!」

古董結他靚木難求 追尋那些年的音色

鄧梓峰除了收藏過百件古董皮褸,還有逾60支結他,當中大部份都是舊結他,全部都是托朋友或上網搜羅得來,為了獲得心頭好,直飛澳洲和英國也屬等閒事。「由1984年我就自學Bass,只是4條線,其實唔難;本身都熟樂理,識結他和大提琴,上手比較易。」說得輕描談寫,但他對自己要求甚高:「玩耐咗好悶,4條線又低音,想有趣一點,決定自彈自唱,對Bass佬來講,熟能生巧到可以當餘慶表演,人地識得欣賞,對我來講多咗一份Compliment,係值得開心的事。」一直到5、6年前鄧梓峰才正式組Band,他卻嫌手上的結他音色欠缺味道:「當我玩舊的Rock ‘n’ Roll,我發現支結他『無咗嗰朕除』,唯有找回那些年的舊Bass才可重現,於是開始四出物色古董Bass。」清一色的舊Bass,很Classic,而且每一支都有段故:「我最崇拜係Beatles的Paul McCartney,英國Band仔好窮,買唔起美國貨,係佢帶紅咗當時廉價的德國牌子Höfner。」無論是第一代的還是第二代的The Beatles Bass,外行人覺得每一支Höfner看起來都很相似,他卻精研天書,細數它的年份和背景,分析Pickup、Control Panel等細節上的差別,如數家珍。「點解舊Bass值得收藏?最主要係因為今時今日靚嘅木好難搵,結他面臨最大的問題係搵靚木,一支30、40年代的歐洲人手訂製的靚木結他,至少都要4至5萬元,只是仿照品而已。」所以他手上一支1958年Fender Bass,價值已經12萬,即使不是他最愛的Höfner,但他依然大讚:「彈起來好開心,因為支結他同我出生年份一樣!」

「輕輕鬆鬆鄧梓峰」,這句街知巷聞的Slogan,來自當年TVB用作宣傳藝人的短片,不但溜口順耳,寫出來的人肯定很熟悉鄧梓峰為人,他與世無爭,勤奮好學,經常展露巴斯光年式的自信微笑,謙稱自己只是學得廣,但學得不夠深。據知他婉拒了飛行會邀請他出任飛行教練,全香港只有5、6位合乎資格的人,他就是其中一位,至於拒絕理由,全因他希望星期六、日可以好好休息,享受Family day. 做人何必太執著?開心就好。

  • Text : Abby Lo
  • Photo : Dan Leung
  • Graphic Design : Justin Li
  • Video : Ethan Lee & Sue Li